نيروز الإخبارية :
يا طراد خل مرافقك مثل شرواك
وأحذر ترافق واحدً كان دونك
أفطن لدربك وأتعض وين ممشاك
وبصاحبك حذرا تغشك عيونك
ما ينشلك من كان بالبير دلاك
واللي يخونك غير يرجع يخونك
لا تزرع المعروف بالنذل لا جاك
ما ينفعك لو تطعمه من متونك
لا صار جرحك ما تداويه يمناك
الناس لو تحتاج ما يعالجونك
ولا صار رأيك ما يقديك يبلاك
مع ناس لنك طحت ما يرحمونك
وبنت الردي لو وصفت بالقمر ذاك
لا تناسب الرديان ما يلزمونك
أتعب على بنت الحسب وأتعب خطاك
عيالها من لون أهلها يجونك
لا صار بك ماصار من ضيق يدهاك
عند الرجال أهل النباء يسترونك
إن قلت يا عيالي يقولون عيناك
إن ما ستروك بشي ما يمصخونك
صلاح عبدالعزيز الهقيش.
